Kolusaun Korupsaun Nepotismo K2N

Oinsa atu hatene K2N ne’e buras ona iha rai ne’e ?

 (by : Q. Brites) 

Nasaun iha nebe deit sempre enfrenta moras Kolusaun, Korupsaun no Nepotismo (K2N), idak-idak ho nia maneira hodi kombate moras mundial ne’e. Timor Leste maske nasaun foun maibe mafiozo no koruptor mos buras, hakarak ka lakohi moras ne’e aumenta ba be-beik. Nasaun iha mundu ne’e to’o ohin loron haka’as an buka dalan ba kombate K2N, hanesan iha China Koruptor sira nia kastigu mak Tara, iha Saudita Arabica koruptor sira tasi liman fuan, iha nasaun vizinho Indonesia sira dehan “Para koruptor di Indonesia bukan masa hukumannya diperberat tapi dipotong masa tahanan”, agora oinsa iha Timor Leste saida mak akontese, Koruptor sira lao livre hela I at liutan maka lei nebe prega ba KAK fraku liu atu implementa ba Koruptor sira. Tanba lei ne’e fraku, membrus K2N nunka tauk, sira halao sira nia aktifidade naok lao nafatin.

Iha edisaun ne’e hau hakarak loke oituan ita nia konsensia kona ba saida mak kolusaun no indikasaun iha Timor Leste to’o ohin loron. Ba sani nain sira katak saida mak hau hakerek la bazia ba estudu fundamental ka liu husi peskija ruma, ne’e hanesan informasaun geral nebe mosu iha ita nia let, atu ita bele hare no hatene lalaok nebe moris iha ita nia rai.

Hau sei fahe ba edisaun tolu tuir malu, permeiro edisaun hau foka ba Kolusaun, segundu parte Korupsaun  no edisaun ikus mak Nepotismo.

Kolusaun, buras ona ka  ?

Wainhira atu responde pergunta iha leten, ita seidauk bele dehan los buras ona tanba kolusaun buat nebe subar metin no laiha dokumento ruma mak sei publika katak iha inkontru segredu ida iha fatin ida ka iha oras ida ka entre A ho B iha fatin ida, ita bele dehan deit katak kolusaun mos eziste iha ita nia rai. Maibe ita mos bele deskonfia ema ruma ka orgaun balun, liu husi  policy ka desizaun ruma nebe kontra lei ou impresario ruma halo buat ruma nebe kontra lalaok legal maibe lideransa sira la foti kauza hasoru hahalok hirak ne’e.

Kolusaun dala barak ejiste iha area ekonomia. Wainhira mosu kolusaun iha industria ruma, imprezario sira servisu hamutuk hodi hatun malu ka buka dalan hodi bele manan nia rival. Wanhira kolusaun mosu ona merkado mos bele nakdoko no aveita liu ba povo nia moris. Kolusaun dala balun akontese ba merkado ho modelu oligopoli. Emprezario sira halo sindikato ho legal maibe nakonu ho illegalidade. Iha regulasaun ba sira maibe regulasaun ne’e iha mensagen forte ba sira atu bele manipula wain hira sira hasoru problema iha sira nia vida negosia. Iha triangle nebe forte maka Emprezario, Lider/Politiko no Agenti Justisa nebe sempre liga malu wain hira hamosu lei ruma ou ezekuta iha tereno.

Hanesan parte ida iha hahalok nebe nia impakto at iha publiko nia let, kulosaun parte ida nebe loke dalan ba Korupsaun, wainhira kolusaun mosu dalan nakloke atu ema bele halo saida deit tanba iha fraze ne’e parte ida hakarak nia interese manan parte seluk nia fo saida mak parte seluk nia hakarak maibe ikus liu maka hotu-hotu osan mak koalia.

Emprezario mafiozo sira sempre hatene se mak sira nia belun iha governo no parlamento. Iha governo sira tenki kuda sira nia ema iha laran (departemento relevante ba ekonomia no negosio). Iha parlamento iha membrus sira nebe bele halo lei nebe fo vanatagen ba vida ekonomia no negosio nian.

Dala ruma debate iha parlamento mosu argument nebe furak no fo benefisio no tane as povo nia interese maibe wain hira ita rona didiak hodi analiza iha argument balun mak adere ba interese partidaria no grupo (bele grupo emprezario ka individual)  nia.

Kolusaun ho Lider/Politiko

Iha nasaun balun emprezario sira sempre fo osan ba kampanya partido politiku atu bele compete no manan iha eleisaun. Nia konsekuensia mak wainhira manan eleisaun Partido politico sira iha tusan ba emprezario nebe suporta iha kampanya. Oinsa partido eleito ne’e atu fo fila sira nia tusan ne’e maka liu husi lei ka regulamento nebe fo benefisio ba emprezario nebe suporta. Kategoria lei nebe fo benefisio ba emprezario mak, Parlamentar sira halo lei ba rai, lei ba impreza, lei ba lisensa sertifikado no seluk-seluk. Karik partido ne’e mak kaer governo iha obsaun balun hanesan fo pasta ministro ekonomia ka ministerio nebe iha knar importante ba nia belun diak impresario nebe tulun.

Iha kazu balun nebe sai preokupasaun ita hotu nia mak emprezario balun hetan projeito la liu husi systema tenderizasaun, nia konsekuensia mak projeito nebe emprezario busa metan ne’e kaer nia kualidade la tuir BOQ ne’be iha. Ne’e parte ida husi kolusaun entre emprezario ho autortidade iha ona lia ida ba fahe porsento husi projeto refere.

Parte nebe buras mak se mak assume kargo ministro ka direitor iha orgaun do governo sempre fo projeito ba nia familia, laen/fen ka subrinho ou ema nebe iha ligasaun familia. Kazu henesan balun prosesu iha tribunal remata ona I balun sei prosesu hela iha tribunal.

Tuir fali mak husi Governo ba emprezario sira. Faktus barak maka akontese hanesan governo hasai ema husi rai nebe nia hela ba hodi entrega ba emprezario sira hodi halao nia aktifidade negosio. Uza lei ba rai hodi hanehan povo. 

Ne’e mak kolusaun koletiva nebe involve estado ho emprezario katak monopoli sei as liu I saida mak nia hakarak nia halo deit la persija tauk tamba sira kuda ona abut hodi hein tempo atu koeleta.

Kolusaun ho Siguransa

Wain hira atu halao nia negosio emprezario sira sempre uza Polisia atu fo siguransa ba sira. Maske Lei hateten ona katak ema hotu-hotu iha direito hanesan atu hetan siguransa maibe iha realidade hatudu katak pesoas siguransa balun sai backing ba emprezario. Backing bele iha jogu illegal, Bar ka Discoteka, halo siguransa ba sasan nebe ilegalmente tama mai nasaun I fo siguransa maksima ba pesoal emprezario nebe senti iha ameasa ba nia an.

Hanesan kazu 20 de maio 2012 wain hira iha demonstrasaun trabalhadores sira ba komemora loron trabalhador mundial mosu asaun nebe halo ema barak protesta tanba Polisia kaptura demonstrante tolunolu resin hodi ba sulan iha stasaun PNTL no lori prosesu ne ba tribunal atu prosesa tuir lei. PNTL ho razaun katak demonstrante sira la tuir lei nebe haruka hanesan laiha licensa ba PNTL no estraga ema nia sasan (Hotel Timor), maibe iha tribunal saida mak PNTL no Ministerio Publiko alega ba demonstrante sira laiha faktu no fo liberdade ba demonstran sira. Ida ne’e hatudu katak Polisia la professional ka iha indikasaun kolusaun ho emprezario Hotel Timor tanba iha tempo hanesan maneger hotel Timor hasai nia trabalhador husi servisu.

Kolusaun ho Justisa

Problema ho justisa barak liu mak ba problema rai, rai nebe nia fatin estrategi sira sempre buka maneiras oi-oin atu hetan, halo kolabora ho diresaun nebe trata terrestres hodi hetan sertifikado falsu hodi duni sai povo nebe hela iha rai ne’e tinan atus ba atus ho razaun dezevolvimento nasional. Emprezario sira duni sai ema nebe hela ba. Povo sempre lakon iha tribunal wain hira problema rai entre povo ho Emprezario sira, kazu barak mak ita hare ho matan nebe mosu iha rai doben ne’e.

Wainhira emprezario balun hakotu kontratu ho nia funsionario ida, emprezario ne’e sempre buka maneiras oi-oin atu la selu ka latuir regulamento trabalhadores nia nebe ejisti. Sira sempre halo kolusaun ho sindikato ka ministerio nebe relevante atu koko fo rezaun oi-oin atu bele manan. Pergunta mak ne’e tanba sa iha ona lei ba trabalhador sira maibe companha balun kontra no laiha sansaun husi governo ba companha ne’e ?  

Iha companha balun laiha kontratu ba nia trabalhador, sira fo servisu deit maibe wainhira iha problema ho trabalhadores companha sempre ho razaun katak trabalhador ne’e mai buka servisu maibe companha la loke vaga ho  hanoin deit ne’e mak hodi fo servisu.

Kazu balun nebe ita hasoru mak, iha ministerio balun wain hira povo ruma atu hasoru direitor ruma sempre la iha aportunidade, maibe wainhira emprezario ka ema nebe iha osan sira sempre atende lalais. Ne’e mos pratika kolusaun bele mos indika ba korupsaun, Razaun katak sira atu servi povo laos servi ema nebe iha osan no poder.

Dala balun iha parte seluk ita hetan emprezario sira han meudia iha restorante no hotel bot sira ho ema nebe kaer knar strategia iha governo (han hamutuk ho sese deit ne direito ema ida-idak nia maibe hanesan ema public figure buat sira ne’e bele evita). Han hamutuk entre emprezario ho lideransa balun iha public fo imagen ladun diak. Atu labele iha hanoin at oi-oin iha publiku  diak liu evita.

Kolusaun nia lalaok sempre segredu wainhira mosu ona problema maka foin ema hatene katak kolaborasaun no konspirasaun nakukun ne’e involve A no B. iha nasaun barak mak hakribi hahalok ne’e. Kolusaun mos iha ligasaun metin ho korupsaun tanba kolusaun bele dudu ema atu sai koruptor tanba ema ne’e bele manipula buat oi-oin atu bele hetan ka naok estado nia sasan.

Atu hamenus kolusaun buras iha ita nia rai Estado tenki iha hanoin atu oinsa halo lei ida nebe forte no fo forsa ba KAK atu halao, iha parte seluk statuto no orsamento partido politiku mos tenki hare tanba se lae mafiozu sira sikat let iha partidu sira hodi manan sira interese. Mafiozu sempre iha dalan no strategia oi-oin atu to’o iha sira nia objetivu. Fo konfiansa maksimu ba individu iha governo nebe hakarak hamos kolusaun iha Timor.

Mai ita hamutuk tau matan ba ita nia rai doben ne’e tuir ita idak-idak nia kapasidade no hanoin mos. Matan Moris Neon Nain. Aluta

(Part 1 husi 3) Hasoru malu iha edisaun 2