Señor Primeiru-Ministru, Señor sira
membru Governu nian,
Distintu konvidadu sira,
Exelénsia sira.
Povu Doben Timor-Leste.
Fó-pose ba governu ida iha
lejizlatura ida nia klaran, iha rai sira balu, sai nu’udar sinál instabilidade.
Iha kazu ida-ne’e, pelu kontráriu, formasaun Sestu Governu Konstitusionál
nu’udar sinál ba lideransa nia maturidade no prova ba instituisaun sira-nia
estabilidade.
Importante atu ita reflete kona-ba
objetivu hosi fó-pose ba Governu ida. Governu sira serve ba saída? Konstitui
governu ida, fó-pose ba governu foun ida tenke sempre sai nu’udar haka’as-an
ida atu hametin ekilíbriu sosiál no soberania nasionál, kria kondisaun
sira-ne’ebé di’ak liután ba dezenvolvimentu sosiál nasaun nian, hadi’a
komunidade sira-nia ekonomia no moris, iha ita-nia rain nia suku no aldeia
sira.
Governu sira tenke sai nu’udar
instrumentu atu serbí nasaun.
Bainhira fó-pose ba Sestu Governu
Konstitusionál ne’e, ha’u hato’o ha’u-nia votu sira-ne’ebé kmanek ba servisu
di’ak no susesu ba señor Primeiru-Ministru Rui Maria de Araújo no ba nia
governu nia membru sira.
Ha’u hato’o hako’ak ho laran-kmanek
ba señor Primeiru-Ministru sesante, maun Xanana—no ha’u transmite ba nia, hodi
ha’u-nia naran no nasaun nian, ita-nia agradesimentu—ba nia vizaun, kapasidade
inovasaun polítika, no mós ba nia vontade atu habelar obrigasaun no
responsabilidade hosi Timoroan nia jerasaun foun ba iha nível aas Estadu
nian.
Hanesan ita toman tiha ona dezde
luta nia laran, maun Xanana sempre hatene hanoin ho forma inovadora, konsulta
ho kompañeiru sira, halo diálogu no hetan solusaun pioneira ba iha problema
sira rai Timór nian.
Hanesan ne’e mak akontese ho
despartidarizasaun ba Falintil, ho orientasaun Frente Klandestina, ho faze
tranzisaun ba referendu no Independénsia, ho prosesu Pás no Rekonsiliasaun, no
mós situasaun sira seluk vida nasionál nian ho impaktu boot ba iha futuru.
Primeiru-Ministru sesante preokupa
tiha ona iha tempu naruk nia laran ho nesesidade atu hala’o tranzisaun ba
jerasaun sira iha lideransa nasaun nian.
Ho forma ne’ebé hanesan, mak nia
serbisu, ho determinasaun, ba libertasaun Pátria, Xanana serbisu, oras ne’e,
atu asegura tranzisaun ida-ne’ebé estavel no iha susesu di’ak:
Hosi jerasaun ne’ebé manan
libertasaun, ba jerasaun ida-ne’ebé tenke manan dezenvolvimentu.
Entrega governu nia lideransa sai
nu’udar jestu ida servisu nian ba nasaun. Buat ne’e mós sai nu’udar lisaun
nasionalizmu no sai nu’udar asaun edukativa, pedagójika, hodi hatudu katak,
halo polítika ne’e signifika tau uluk interese Nasaun nian.
Jerasaun tinan 75 nian sei iha buat
barak atu fó ba nasaun.
Líder sira iha koñesimentu,
esperiénsia, prestíjiu nasionál no internasionál, ne’ebé kontinua koloka ba
servisu nasaun nian.
Desizaun Primeiru-Ministru sesante
nian atu serbí iha governu hanesan ministru, merese hetan saudasaun no elojiu
tanba hametin konfiansa no estabilidade, iha tranzisaun jerasaun ida-ne’e. Iha
nia responsabilidade foun sira, maun Xanana sei kontribui, sertamente, ba iha
diversifikasaun ba ita-nia ekonomia no aumenta afirmasaun rejionál no
internasionál Timor-Leste nian iha dalan ba dezenvolvimentu.
Jerasaun tuan no jerasaun foun serbisu
iha ekipa, atu ita halo Timor-Leste hakat ba oin.
Ha’u hakarak kumprimenta
espesialmente Primeiru-Ministru Rui Maria de Araújo. Señor Primeiru-Ministru
iha esperiénsia governativa, no ninia asaun, ne’ebé prudente no efikás, manan
komunidade nia konsiderasaun. Dr. Rui Araújo mós nu’udar médiku ida-ne’ebé
respeitadu, apresiadu, no koñesidu tanba trata nia ema-moras sira ho dedikasaun
boot no laran-kaman. Ha’u fiar katak, iha ezersísiu ba nia funsaun sira iha
xefia governu, nia sei diriji dedikasaun ne’ebé hanesan no tau laran-kaman
ne’ebé hanesan iha tratamentu ba asuntu sira estadu nian no sidadaun sira-nian.
Tinan rua ho balun liu tiha ona,
bainhira ha’u fó-pose ba Kintu Governu, ha’u halo rezumu ba prioridade balu iha
faze vida nasaun nian ida-ne’e: habelar prezensa Estadu nian iha territóriu
laran tomak; moderniza Infra-estrutura; kria Sentru sira Dezenvolvimentu nian;
impulsiona Setór Produtivu; aprofunda integrasaun Rejionál no Internasionál
nasaun nian.
Realidade hatudu mai ita katak
ha’u-nia preokupasaun sira-ne’e hetan komprensaun hosi nasaun, no rona hosi
governu. Esforsu ida hala’o tiha ona atu implementa prioridade sira-ne’e. Iha
pontu sira balu ita avansa liu, iha pontu sira seluk ita avansa menus. Maibé
ita la’o iha diresaun ne’ebé loos.
Hanesan ha’u refere iha Parlamentu
Nasionál iha abertura solene ba sesaun lejizlativa oras ne’e nian, ha’u la
hatene kona-ba rai seluk ne’ebé hala’o tiha ona buat barak hanesan Timor-Leste
iha tinan sanulu resin-rua dahuluk independénsia nian.
Foin ba dala uluk iha istória, ita
iha Estadu Direitu iha Timor-Leste. Ita iha estabilidade no pás. Demokrasia
lori respeitu ba Direitus Umanus no dignidade sidadaun sira hotu nian ba
ita-nia rain.
Nasaun oras ne’e hala’o esforsu
boot—ho susesu—iha formasaun ba kuadru nasionál sira, iha área sira hotu.
Majistradu, médiku, profesór,
polísia no tékniku kualifikadu nasionál sira seluk, mane no feto sira,
administra justisa, asegura kuidadu saúde, funsionamentu ba eskola sira,
seguransa no hakmatek iha suku no aldeia sira iha nasaun laran tomak, maske iha
karénsia sira-ne’ebé boot, ne’ebé kontinua eziste, no sira-ne’ebé ha’u sei
ko’alia ba Ita-Boot sira la kleur tan.
Ha’u hakarak subliña ho forma
espesiál ba asaun Kintu Governu Konstitusionál nian, ne’ebé marka tiha ona ho
dezenvolvimentu fundamentál sira ba oras ne’e no futuru nasaun nian.
Hahú funsionamentu ba sentrál
eléktriku sira-ne’ebé foun no alargamentu ba rede distribuisaun eléktrika, iha
importánsia estratéjika ida ba futuru. Ha’u hein katak la kleur ahi-elétrika
sei fó-benefísiu ba maun-alin no inan-feton sira iha suku no aldeia sira nasaun
nian.
Prezensa Estadu nian aumenta iha
distritu sira. Iha tiha ona lansamentu ba programa sira deskonsentrasaun no
desentralizasaun administrativu, no programa sira investimentu lokál nian. Iha
suku barak, situasaun populasaun nian sai di’ak liután.
Iha tiha ona lansamentu ba sentru
dezenvolvimentu rua, iha kosta Súl no ida Oecusse nian, ne’ebé sei envolve mós
Ataúro. Sentru dezenvolvimentu sira-ne’e sai nu’udar projetu sira ho
importánsia estratéjika, ne’ebé tenke kontribui atu diversifika ekonomia
nasionál no aprofunda integrasaun ekonómika rejionál.
Pose ba Sestu Governu
Konstitusionál ne’e sai nu’udar pasu foun ida iha dalan ba ita-nia
objetivu sira atu konsolida Estadu, hametin ekonomia no hadi’a kondisaun sira
moris nian no mós afirmasaun no ezersísiu ba soberania nasionál.
Sestu Governu Konstitusionál ne’e
sai nu’udar governu kontinuidade ida, ne’ebé sei kontinua atu aperfeisoa,
bainhira nesesáriu, implementasaun ba polítika sira no ezekuta Orsamentu Estadu
ne’ebé aprova tiha ona hosi Parlamentu Nasionál.
Governu ne’e harii iha ambiente
estabilidade nia laran, liuhosi prosesu konsulta no diálogu, no iha kondisaun
atu halibur apoiu sosiál nian ida-ne’ebé ampla. Estabelesimentu ho akordu
polítiku ne’ebé alargadu ba iha prioridade nasionál sira dezenvolvimentu nian
sai nu’udar sinál di’ak ida. Iha unidade nia laran de’it mak ita bele alkansa
ita-nia objetivu sira.
Governu ida-ne’e, iha nia oin, iha
lejizlatura sorin-balu—entre fulan-Fevereiru tinan 2015 no fulan-Jullu tinan
2017. Tinan rua ho balun la’ós tempu ne’ebé barak. Maibé nu’udar tempu
sufisiente atu hadi’a métodu sira servisu nian, aperfeisoa funsionamentu
Administrasaun nian no kualidade ba servisu sira ne’ebé Estadu fó ba populasaun
sira—iha Dili no iha nasaun laran tomak.
Iha tinan rua tuirmai, governu ne’e
iha oportunidade renovada atu serbí nasaun no tulun hodi hatan ba dezafiu sira.
Maske ho avansu sira-ne’ebé ita
realiza tiha ona iha tinan 12 dahuluk ne’e, ita-nia povu sira-nia karénsia no
nesesidade sira nasaun nian no mós konsolidasaun ba Estadu kontinua sai boot.
Bainhira ha’u promulga orsamentu
sira Estadu nian iha tinan 2014 no iha tinan 2015, ha’u manifesta iha mensajen
sira ba Parlamentu Nasionál ha’u-nia preokupasaun sira kona-ba sustentabilidade
ba despeza Estadu nian no kualidade hosi despeza ida-ne’e, ne’e maka ninia
utilidade ba nasaun.
Ha’u hakarak fahe reflesaun balu ho
Vossa Exelénsia sira kona-ba kestaun ida-ne’e.
- Ha’u preokupa ho dependénsia maka’as
Estadu nian ba reseita sira hosi Fundu Petróleu. Setór produtivu
nasionál—agrikultura no indústria—tenke hetan dudu ho polítika sira-ne’ebé
efisiente, hodi bele reforsa, hamosu reseita fiskál foun no hamenus kapitál
sira Timor-Leste nian mak sai ba rai-liur.
- Ha’u preokupa ho kiak maka’as
ne’ebé kontinua eziste. Bainhira ha’u halo viajen no halo vizita ba suku no
aldeia sira, ha’u haree situasaun sira karénsia nian ne’ebé boot.
Governu sira uluk hahú hatan ona ba
problema ida-ne’e. Maibé ita tenke halo buat barak no halo di’ak liután, hodi
tulun ita-nia rain nia maun-alin no inan-feton sira-ne’ebé karensiadu liu.
Situasaun sira kiak no karénsia boot nian ne’ebé persiste, atraza
dezenvolvimentu nasionál.
Ha’u preokupa ho gastu sira Governu
nian ne’ebé arbiru de’it. Timor-Leste iha osan, maibé la riku. Estadu tenke
gasta ho konxiénsia no prudénsia—uza ho didi’ak osan nasaun nian.
Nesesidade atu konsolida Estadu no
dezenvolve nasaun rekere medida sira-neebé rapidamente posível iha
aperfeisoamentu ba funsionamentu Administrasaun Públika no polítika sira Estadu
nian iha setór importante sira ba ekonomia no sosiedade—hanesan Agrikultura,
Edukasaun no Formasaun ba Rekursu Umanu, Veteranu sira, Joven sira no buat sira
seluk.
Dezafiu sira konstrusaun nasionál
nian ne’e boot. Ho dedikasaun no empeñamentu ema hotu nian de’it, governu no
sidadaun sira, mak ita bele manan hasoru dezafiu sira-ne’e.
Ha’u apela atu iha nesesidade ba
rigór no servisu—iha asaun governu no sosiedade nian. Governu mak tenke, uluk
nana’in, fó ezemplu.
Maibé mesak-mesak governu labele
rezolve problema sira.
Estadu labele hadi’a ekonomia
mesa-mesak. Servisu sira saúde nian, mesa-mesak, labele hadi’a sidadaun
sira-nia saúde. Profesór sira mesa-mesak la konsege hetan rezultadu.
Nasaun presiza família sira-nia
partisipasaun, partisipasaun hosi sidadaun sira hotu, mane no feto sira
Timor-Leste nian, atu implementa polítika sira-ne’ebé nesesáriu no realiza
ita-nia dezenvolvimentu nasionál nia objetivu sira. Tanba ne’e, ha’u apela ba
governu atu hatene rona, serbisu ho komunidade, no envolve sidadaun sira iha
solusaun ba sira-nia problema, iha nasaun laran tomak.
Maun-alin no inan-feton sira.
Timoroan sira iha kapasidade atu
manan no harii nasaun ida-ne’ebé ita mehi ba. Ita manan tiha ona independénsia
atu lori nasaun ne’e hakat ba dook liután no hadi’a Timór nia rai-lulik.
Objetivu sira-ne’e só bele alkansa ho pás, estabilidade no servisu.
Timor-Leste nu’udar nasaun ki’ikoan
ida. Ita-nia kbiit maka iha unidade no matenek— hosi povu no líder sira.
Jerasaun tuan iha autoridade própria
no konfiansa hosi povu, ba prova sira dedikasaun no sakrifísiu nian ne’ebé fó
durante luta tinan 24 nia laran.
Jerasaun sira-ne’ebé foun liu tenke
afirma-an, oras ne’e, ba kapasidade atu dezenvolve no hametin instituisaun
sira, no halo Estado hatan, ho barak no di’ak liután, ba ita-nia rain nia
maun-alin no inan-feton sira-nia nesesidade sira.
Personalidade sira-nia karisma sei
substitui hosi konfiansa ba instituisaun sira. Ita hotu tenke serbisu no
kontribui ba susesu iha prosesu ida-ne’e.
Ha’u hakarak reitera ba señor
Primeiru-Ministru Rui Maria de Araújo votu sira laran-kmanek nian ba susesu—atu
nune’e, ho serenidade, ponderasaun no efisiénsia, ita serbisu atu realiza
nasaun no Timoroan sira-nia objetivu sira.
Señor Primeiru-Ministru, bele konta
ho kolaborasaun no apoiu Prezidente Repúblika nian atu hatan ba dezafiu sira no
harii liután unidade, prosperidade no moris-di’ak ba povu no rai Timór.
Ba Vossa Exelénsia no membru sira
governu nian, ha’u hato’o votu sira ba servisu di’ak.
Husu boot Maromak
haraik bensaun mai ita, no haraik-bensaun ba rai Timór.
Tidak ada komentar:
Posting Komentar