DEKLARASAUN POLÍTIKA DEFENDE PIPELINE GREATER SUNRISE MAI TIMOR-LESTE

COMBATENTES E VETERANOS DA LIBERTAÇÃO NACIONAL DE TIMOR-LESTE INTRODUSAUN Kombatentes no Veteranus da Libertasaun Nasionál ne’ebé kompostu husi Frente Armada, Klandestina, no Diplomátika, defende makaz riku soin Timor-Leste nian, li-liu konaba proseu negosiasaun ne’ebé hamosu polemika iha povu Timor-Leste nia le’et konaba situasaun dezenvolvimentu kampu mina no gas Greater Sunrise. Tanba ne’e, tuir informasaun, Greater Sunrise ne’ebé iha tasi Timor ho rezerva mina no gas ne’ebe ho distánsia 180 km, besik liu mai rai maran Timor-Leste ninian duke ba Austrália mak ho distánsia 500 km. Kombatentes no Veteranus husu ba governu atu uza nia kompeténsia tomak tuir Konstituisaun RDTL, haktuir ba Lei petrolíferus no tratadu hirak ne’ebé mak iha ona, no sei kontinua iha prosesu negosiasaun hodi bele asigura pipeline / kadoras iha kampu mina no gas Greater Sunrise ne’e suli duni mai iha Timor-Leste. Kombatentes no Veteranus mos hatene momos katak, Governu ne’ebé lídera hosi maun bo’ot Kay Rala Xanana Gusmão, liu husi Secretário de Estado Rescursos Naturais, mos hala’o tiha ona estudu viabilidade husi aspektu tékniku, komersiál no sosio-ekonomika konaba pipeline atu dada mai iha Timor-Leste. Kombatentes no Veteranus rona no hatene katak tuir estudu hirak ne’e, pipeline / kadoras husi Greater Sunrise téknikamente posivél atu dada mai Timor-Leste, liu husi tasi klean ne’ebé kompañia sira sempre dehan imposivél. Kombatentes no Veteranus mos rona no hatene katak, rezultadu estudu viabilidade konaba pipeline no hari’i fábrika LNG (Liquid Natural Gas) ida, iha Timor-Leste ho investimentu besik USD 7 Billioens ne’e komersiálmente viavél no fo vantajen bo’ot ba nasaun tanba bele kria kampo traballu, kontribuisaun arrendamento taxa ba estado no oportunidade ba povo tomak hodi goza riku-soin ida ne’e, la’os atu serbi fali de’it ba interese kompañia sira nian. DEKLARASAUN Konsidera no observa ba pontus sira temi iha leten ne’e mak, ami kombatentes no veteranus ne’ebé kompostu husi Frente Armada, Klandestina no Diplomátika tuir mai deklara katak : 1.Ami Kombatentes no Veteranus fo apoiu másimu ba estadu/governu RDTL atu kontinua halo negosiasaun konaba Greater Sunrise ho firme, hodi dada pipeline/ kadoras mai iha Timor-Leste. Tanba ne’e mak; povu Timor-Leste nia aspirasaun no dalan úniku hodi defende soberania no dignidade nudar povu no nasaun ida. 2.Ami Kombatentes no Veteranus, izizi ba estadu/governu RDTL atu dedika ninia kbi’it tomak hodi hahi’í nafatin interese nasionál, li-liu ba libertasaun povu ida ne’e husi mukit. 3.Ami Kombatentes no Veteranus, rezeita proposta ne’ebé mai husi kompania Woodside atu halo floating LNG (Liquid Natural Gas)/ fábrika Gas iha tasi leten, tanba konseitu ne’e atu uza fali riku-soin Timor nian hodi halo fali projeitu ne’ebé fo vantajen deit ba kompania nia interese. 4.Ami Kombatentes no Veteranus, fo apoiu másimu ba estadu/governu RDTL nia desizaun atu rezeita floating LNG (Liquid Natural Gas) no hakotu tiha negosiasaun Greater Sunrise bainhira pipeline/kadoras la-dada mai Timor-Leste, no mos fo apoiu atu esplorasaun ne’e di’ak liu husik ba futuru jerasaun duke husik ba kompañia sira uza hodi serbi ba sira nia interese. Ami kombatentes no veteranus, konsidera katak pipeline mai Timor-Leste ne’e justu tebes ba povu no Estadu rai rua ne’e nian, tanba pipeline husi Bayu Undan dada ona ba Darwin, Austrália. 5.Ami Kombatentes no Veteranus, fo apoiu másimu ba desizaun Governu no aspirasaun povu Timor-Leste tomak atu hala’o explorasaun mina no gas iha área seluk ne’ebé iha tasi Timor hodi bele fo benefisio ba povu rai ida ne’e nian. 6.Ami Kombatentes no Veteranus, husu ba kompañia hot-hotu ne’ebé explora mina ka riku-soin iha teritório Timor-Leste tenki respeita intergridade, soberania no instituisaun estado Timor-Leste nian. 7.Ami Kombatentes no Veteranus, husu ba Governu Austrália, atu ho laran luak simu ami nia aspirasaun, dada pipeline mai Timor-Leste, nune’e bele hadia ekonomia no prosperiedade ba povu Timor-Leste no bele hametin liu tan lasu amizade no solidariedade entre povu rai rua ne’e. 8.Ami Kombatentes no Veteranus Timor-Leste, apela ba maluk veteranus husi Federasaun Mundiál ho Veconac atu ho laran luak fo apoiu ba ami nia aspirasaun, ida ne’ebe atu dada pipeline/kadoras husi Greater Sunrise mai Timor-Leste, nune’e bele hadia ekonomia no prosperiedade povu rai ida ne’e nia moris. Li-liu ba veteranus Austráliano ne’ebe iha lasu amizade no solidariedade ho povu Timor-Leste mak nakonu ho valór historíku, heroíku no patriotismu iha segunda guerra mundiál. 9.Ami Kombatentes no Veteranus, husu ba povu Austrálianu no belun solidariedade sira atu ezizi nafatin ba governu Austrália nudar nasaun ne’ebé adiantadu, nakonu ho rekursu naturál, poténsia ekonomika, polítika, bainhira kompara ho Timor-Leste, mos iha komitmentu atu reduz povu mukit iha rejiaun ne’e no iha mundu, atu bele realistíku liu-tan iha negosiasaun Greater Sunrise. 10.Ami Kombatentes no Veteranus, husu ba Orgaun Soberania, Partidus Politikus, ONG, Sosiedade Sivil, Joven no Povo Timor-Leste tomak atu tau a’as interese nasionál no kuidadu ho tentativas no manobra oi-oin husi ajente kompañia mina no gas sira ne’ebé atu hafahe Timor-oan sira hodi apoiu sira nia interese. Dili, 24 Setembru 2010 Asina Husi : Reprezentante dos Combatentes e Veteranos da Libertação Nacional de Timor-Leste : 1.Kordenador Jerál; Vasco Da Gama; alias Criado............... 2.Vice Kordenador; Jil Da Costa Monteiro; alias Jil Oan-Soro... 3.Sekretáriu; Jorge Alves; alias Wemoris....................... Membros da Comissão: 1.Paulo Alves Sarmento; alias Tuloda.......................... 2.Aquelinho Fraga; alias Eteuko................................ 3.Cesar dos Santos Fátima.; alias Merak........................ 4.Jacinto Viêgas Vicente; alias Roke........................... 5.José da Silva Panao; Folaran................................. 6.Ernesto Fernandes; alias Dudo................................ 7.Zacarias Fátima; alias Maputo................................ 8.Domingos Augusto; alias Deker................................ 9.Domingas Alves da Silva; alias Bilou-Mali.................... 10.Antoninho Baptista Alves; alias Hamer....................... 11.Andre da Costa Belo; alias L4............................... 12.Fausto Freitas da Silva; alias Liuraitasi................... 13.Julião A.; alias Mausiri.................................... 14.Francisco J.M.F. B.; alias Lires Fera....................... Dili, 24 Setembru 2010