Estoria Husi Aze Kiik wainhira hamutuk Comandante Nino Konisantana

Estoria ida ne’e husi Aze iha Ermera. Nia fo nia memoria murak ida mai ita wainhira nia hahu fo an ba luta libertasaun nia. Ema barak rona deit Comandante Nino Conisantana nia naran. Maibe Aze hamutuk ho Comandante Conis to’o remata. Oinsa atu hatene mai ita lee deit estoria ida ne’e. Ida ne'e hanesan storiu memoria ida iha hau nia moris iha funu libertasaun da patria nebé Timor oan tomak halo atu liberta rai ida ne'e husi okupasaun militar Indonezia. Hanesan labarik Timor oan sira seluk nebé moris iha tempu okupasaun Indonesia, dala barak ita lahatene tuir tansa mak iha ita nia rai ne'e iha hela deit funu. Ita nia inan aman sira mos tauk no nunka konta mai ita kona-ba tansa iha funu, iha ita nia rai. Ita rona deit informasun oin-oin mai husi aoturidadi Indonezia nian katak Tentara (militar) Indonezia nian teru-malu ho ema ai-laran. Ita rona tiru-malu iha loro manu no iha loro sae. Dala ruma mos ita rona katak milatar indonezia tiru malu ho Fretilin, nebé ita hatene Falintil Maibé militar Indonezia nia hatene mak Fretilin. Maibé kona-ba funu ida ne'e ema lakonta ba ita mos, ita nain sai hatene bainhira ita boot. Ita nain sai hatene liu husi prosesu nebé la'o iha funu nia laran. Ita hatene liu husi terus no bate nebé Timor oan hetan. Dala ruma mos ita nain hatene liu husi violasaun no tortura nebé ita rasi hetan husi militar indonezia. Hanesan mos hau, bainhira hau moris iha ila kiik-oan ida iha Ersoi-Poipung, Ermera Tuan, loron 20 Novembru 1982, hau lahatene saida mak akontese iha ita nia rai laran. Ema ruma mos nunka konta mai hau iha tempu hau sei ki'ik kona-ba funu ida ne'e. Bainhira hau iha tinan 8, hau nia inan aman hatama hau iha eskola SDN 01 Ermera, hau rona deit husi hau nia maluk sira katak Tentara Indonezia sira tiru malu ho ema ai-laran, ka Fretilin. Dunar labarik ki'ik hau lahatene saida mak funu, se mak ema ai-laran no saida mak Fretilin. Bainhira hau eskola to'o ona klase III , iha tinan 1993, hau rona hau nia Apá no Amá trasa atu halo uma no halo haris fatin iha liur. Entau hau nudar labarik hamutuk ho hau nia maun sira halo haris fatin. Bainhira ami halo hotu haris fatin, iha kalan ida hau nia Apá haruka ona hau ho hau nia maun ida katak ba bolu sira ona mai haris. Hau la hatene Apa hatete saida mai ami nain rua hau nia maun. Hau tuir deit hau nia maun nebé sai dadauk ona husi uma. Tuir dalan, hau hanoin hela deit hau nia apa nia liu-fuan "ba bolu ona sira mai haris". Hanoin ba lia-fuan apa nian ne'e mosu perguntas. Sira se? No iha nebé?. Maibé ida ne'e perguntas iha hau nia laran deit. Hau mos dunka husu ba hau nia maun ne'e la'o uluk iha hau nia oin. Ami nain rua la'o mais ou menus …………husi ami nia uma, to'o iha fizinu ida nia uma, hau hare ema barak mak tuur iha uma laran. Sira tuur iha nakukun nia laran deit. Derepenti hau nia maun para no bisu-bisu mai hau katak sira ai-laran mai. Rona tiha hau nia maun, hau nia hanoin sai dook liutan, tanba hau hau lahatenbe saida mak sira ai-laran. So hau hatene deit mak ai-laran ne'e katak kafe laran nebé bain-bain ami ba hili ai-sunu ba. Hau ho hau nia maun tama ba uma laran, hau hare ema mane barak mak tuur nakonu iha uma laran, mesak fuk naruk deit. Ami nain rua tama ba, kaer lima no hakuak malu ho sira hotu. Husi ema sira buk naruk ne'e ida hakuak hau nia maun bisu-bisu hela buat ruma ba hau nia maun. Dala ruma, karik sira husu situasaun iha dalan. Ami rua hau nia maun mos la konsege tuur, sai fali ona ho sira (Falintil) nain rua mai ami nia uma hodi haris. Iha tempu nebá hau la hatene sira seluk ne'e ba fali iha nebé Maibé konserteza sira fila fali ba ai-laran. Fou-foun hau ho hau nia maun ba bolu ne'e hau lahatene sira nain rua nebé ami ba bolu ne'e se. Maibé liu tiha ne'e mak hau mos hatene katak ida ne'e mak Komadante Nino Konisanta ho nia siguransa ida, ho naran Sumojo. Husi ne'e mak hau mos hatene ema ai-laran ne'e se? Fretil no Falintil ne'e se? No tansa sira hakarak hela iha ai-laran hodi funu? Bainhira sira mai tiha haris afinal sira mos la fila ona. Sira hela ona iha ami nia uma mais ou menus semana rua hanesan ne'e. Iha semana rua nia laran ne'e, kalan-kalan sira tuur hamutuk, koalia hela deit to'o madrugada foin sira toba. Duranti sema rua nia laran ne'e, kalan-kalan hau mos haré, ema balun nebé iha tempu nebá hau lakoinese sempre mai-hela deit. Bainhira hau boot hau hanoin fali ema nebé kalan-kalan sempra mai, ida mak ita hatene nudar primeiru komadante Falintil rejion Quatru, ho naran Dudu. Buat nebé sira kalan-kalan koalia duranti semana rua nia laran ne'e, mak strategia halo rejistensia hasoru militar Indonesia. Parte ida husi stratejia ne'e mak planu kona-ba oinsa atu halo rai-kuak hela fatin ba Falintil sira iha ami nia uma laran. Atraves ho Komadante Nino Konisantana hela iha ami nia uma, iha tinan 1993 nebé hau sei iha tinan 11, hau mos komesa komprende ona tansa mak iha funu. Hau mos hatene ona katak funu ida ne'e laos ita nia hakarak Maibé ema mak hanehan hela mai iha ita nia leten. Entau iha tempu nebá kedas hau komesa involve an ona iha prosesu funu ne'e nia laran. Koaze loron-loron hau hasoru malu ho Komadante Nino Konisantana ho nia siguransa Sumozo. Komesi sira mos hanorin ona hau kona-ba oinsa bele halo siguransa, hato'o informasun bainhira hetan informasaun ba sira no oinsa bele hato'o informasaun. Komadante Nino Konisantana komesa hanorin hau, oinsa lori surat nebé hasai husi Komadante ba ema sira (redi klandistina) ne'ebé iha ligasaun ho Falintil. Nune'e mos hau bele lori surat husi klandistina sira nebé iha ligasaun ho Komadante konis ba fo iha Komadante Konis. Sira hanorin bainhira hau lori surat segredu ruma husi komadante Konis, la'o husi dalan hau hak-fuik ka kanta tiha halo hanesan buat ida laiha. Hanorin mos oinsa hau bele buka hatene situasaun hodi informa ba sira. Para bele hatene situasaun iha bairo laran no buka hatene situasaun iha Ermera laran, hau ba kesi karau no kuda iha dalan ka besik fatin militar indonesia nian hodi hatene sira nia lalaok. Antes buat sira nia sira hanorin hau, fou-foun hau mos hetan ameasa husi Komadante Nino Konisantana. Iha loron primeiru sira hela iha uma, bainhira hau atu ba eskola, Komadante Nino Konisantana bolu hau ba uma laran, nia foti kilat hatudu mai hau hodi ameasa hau. Nia dehan ba hau hanesan ne'e, "o ba eskola mak fo hatene ema ruma rona hodi fohatene ba militar sira mai, ami tiru mate hotu imi mak tentara sira bele kaer ami ka mate". Situasaun hanesan ne'e la'o iha tinan ida nia laran. Liu tiha tinan ida, iha tinan 1994, hau nia Aman, Komadante Nino Konisantana no Komadante Dudu planu halo rai-kuak hela fatin iha ami nia uma laran. Komesa ida ne'e hau ho hau nia familia tomak hanesan hau nia alin, maun no inan aman sira komesa ke'e rai kuak iha ami nia uma laran hodi hadia fatin hela nian ba Komadante Nino Konisantana. Mezmu hau sei ki'ik mais hau mos ke'e rai, suru rai. Bainhira ami ke'e rai-kuak ne'e naruk liu ona, hau sae sai rai-ut labele ona. Maibé ami tauk ema hatene entau tenki ke'e no suru rai-ut lalais. Hau tama ba rai kuak laran suru rai tau iha balde nia laran depois kisi tali ba hodi hau nia Apa-Ama no maun alin sira dada sae. Rai kuak nebé ami ke'e, mais ou menus nia luan 6,5 m x 4 m, ho nia naruk mais ou menus 4,5 m. Ke'e rai kuak ne'e hanesan servisu todan ida mai ami. Laos sai hanesan servisu todan deit mai hau no hau nia familia uma laran Maibé sai mos amiasa boot ida ba ami nia fida moris nian. Tanba ema seluk bele diskunfia rai nebé ami ke'e hodi fo hatene ba militar, konserteza ami mate hotu. Maibé buat sira ne'e la akontese to'o ita nia funu rezistensia remata ho fitoria ukun rasik an. Maluk sira konserteza dufida ho rai nebé ami ke'e. Maluk sira konserteza la fiar rai nebé ami ke'e luan teb-tebes mais ema la hatene. Entau rai-ut husi rai kuak nebé naruk tebes ne'e, soe ba nebé? Ne'e loos duni. Maluk sira hakarak tene? Iha ami nia uma sorin ne'e, iha rai as ida. Hodi bele taka para ema labele diskunfia, ami mos tenki ke'e rai as ne'e halo tetuk. Hodi nune'e para rai-ut sira nebé ami hasai husi rai-kuak nebé ami ke'e iha uma laran bele bakar kahur ho rai-ut nebé ami ke'e husi rai as ne'e para ema labele hatene. Tanba ne'e mak loron ami halo finzi ke'e rai as nebé iha ami nia uma sorin ne'e hodi halo tetuk, kalan ami ke'e rai-kuak nebé hodi halo hela fatin ba Komadante Nino Konisantana. Komunidadi balun mos mai husu ba hau nia Apa, "katuas nusa mak ke'e rai ida as loos ne'e? Hau nia Apa hatan ho kalma, "ita laiha servisu ne'e naran ke'e halimar, halo tetuk tiha rai para labarik sira halimar ba. Bainhira ami ke'e hotu tiha, hau nia Apa haruka fali hau no hau nia maun alin sira ba hili fatuk no raut hamutu rai henek iha mota. Tanba ami hela iha laletek nebé dook husi mota tenki halibur fatuk no rai-henek barak tiha foin lalin dala ida deit iha loron ida. Fatuk no rai-henek nebé presiza barak hodi hadia fatin ne'e ami tenki lalin lalais para halo fatin mos lalais. Tanba ami nia uma iha laletek kadaves hau lori rai henek la'o to'o labele no tanis iha dalan. Maibé lori nafatin to'o hotu. Lalin rai-henek no fatuk hotu hau nia Apa mos ba sosa tan ai-kabelek nebé kado iha fatin nebé dook teb-tebes husi ami nia uma. Mais ou menus iha kilometur 4 husi ami nia uma. Ami tenki lalin hotu ai-kabelak sira ne'e iha tempu nebé badak. Hau hulan ai-kabelak labele, soe tun tiha barai tanis deit. Maibé maun-alin sira no inan aman sira la fadigadu buat ida sira nonok deit laos sira nian. Entau hau mos hit fali deit ai hodi ba to'o iha uma. Bainhira ami hulan hotu ai ne'e, hau nia kabas sira kanek hotu. Bainhira Fatuk, rai-henek, no ai-kabelak prontu tiha ona, hau nia Apa ba sosa sumenti ho besi iha merkado Ermera nebé dook husi ami nia uma mais ou menus kilometru tolu ho balun. Ami nia uma iha laletek, merkadu iha tun fali parte soul husi ami nia uma. Sementi ho besi sira nebé hola, ami lalin deit. Tanba tenki hola oituan-oituan hodi militar indonezia labele diskunfia, nune'e mos komunidadi rasik labele diskunfia. Bainhira iha tempu lalin sementi no besi hau sei hanoin hela iha dadersan ida, hau nia apa bolu hau no hau nia Alin. "Ze ho Alau, orsida tuir hau ba merkado hodi foti sementi". Koalia tiha hanesan ne'e hau nia apa mos sai daudauk ona tuun ba merkado. Hau rona tiha hau nia apa nia lia fuan ne'e hau nia laran susar teb-tebes tanba hau tenki hulan sementi sa'e rai lolon nebé dook husi uma. Maibé hau labele halo buat ida, hau nonok deit. Hau mos labele koalia buat ida ba hau nia alin nebé sei kiik liu hau. Hau hanoin hau nia alin mos hanoin hanesan hau, nia laran triste tanba tenki lori sasan todan nebé dook husi uma. Iha tempu nebá, bainhira liu tiha oras ida ho balun hanesan ne'e, hau nia apa ba merkado, hau no hau nia alin mos tuir hau nia apa ba merkado. La'o tuir dalan, hau mak uluk depois hania alin tuir hau. Duranti iha dalan klaran hau mos nunka hateten buat ida ba hau nia alin no hau nia alin mos nunka hateten buat ida ba hau. Ami idak-idak hanoin hela iha ami nia laran kona-ba todan nebé ami sei lori. Tuir lolos ami bele halai husi todan nebé ami atu ba lori. Maibé iha tempu nebá ami labele halo, hau rasik lahatene atu halo saida loos. Mezmu ami sinte laran tauk atu ba hit sasan nebé todan Maibé ami mos nunka atu hatan ba ami nia apa katak ami lakohi lori tanba todan ka ami labele lori. Maibé saida mak hau nia apa heteten hau no hau nia maun-alin sira tuir deit. Bainhira ami lori buat ruma labele ona, ami tanis deit iha dalan. So ida ne'e deit mak hau bele halo. Tanis, tanis to'o nain sai nonok fali deit no kontinua lori buat todan nebé mak iha. Dala ruma hau tanis bainhira lori buat todan ruma labele, hau nia apa sai siak tan hau. Bainhira hau no hau nia lin to'o iha merkado, hau nia apa hein tiha ona iha loza nebé bain-bain hola sasan ba. Ami rua hau nia alin to'o ba hau nia apa hatudu kedas ba sumenti sak lima nebé tula hamutuk hada hela iha rai, besik odamatan ninin loza nian. Hau la koalia barak tan, hakat ba rasta koko somente saka ida. Hau senti todan tebtebes no labele lori. Derepenti hau roda husi hau nia kotuk, hau nia apa nia lian hateten, "labele kokok lori mesak" hau nia apa hateten. Hau mos husik tiha saka sumenti nian no hamrik tiha hodi hateke ba hau nia apa. "Imi rua fahe saka ida, kore tiha, hau sei husu fatin husi maun Martinu hadi fahe sementi ba imi rua lori. Tiu Martinu mos hak daudauk ona mai lori hela saka mamuk ida husi uma kotuk. Tiu martinu ne'e hanesan loza nain. Loza nebé hau nia apa bain-bain ba hola sumente, besi no sasan seluk tan kona-ba uma nian iha nebá. Tiu Martinu kolega diak ho hau nia apa, hanesan bain-bain nia ajuda hau nia apa, sira nain-rua kore sumente ne'e, fahe ba rua, foin fo ba hau ho hau nia alin lori ba uma. La'o husi dalan hau ho hau nia alin tur dala barak foin to'o ba ami nia uma. Dalan nebé bain-bain ami la'o deit mais ou meus oras minutu 20 nia laran sai fali oras tolu foin to'o ba uma. Bainhira sasan sira hanesan fatuk, rai-henek, sementi no ai, prontu tiha, komesa ami hada fatin iha oras kalan-kalan. Iha tempu ami halo fatin ne,e molok rai nakaras oras tuku ne'en, ami han hotu ona. Molok han tiha balun ba hare netik situasaun no sira seluk kahur masa hudi hada bloku iha rai okos ne'ebé ami ke'e tiha ona iha semana hirak kotuk liu-ba. Bainhira ami hada hotu tiha fatin ne'e, reboka tiha no hatetuk tiha laran ami sinte hanesan servisu fisiku nia kaman oituan. Fatin ne'ebé ami hada iha rai okos ne'e iha sala boot ida no haris fatin ida. Odamatan tama nian liu husi leten, hodi eskada ai mak bele tama ba iha laran. Nune'e mos atu sai, sa'e husi eskada ne'ebé tula ba. Alende odamatan tama nian, iha mos odamatan ida seluk ne'ebé hanesan odamatan emerjensia. Odamatan ida ne'e uza bainhira ema inimigu ruma taka derpenti iha leten, ema bele sai husi odamatan ida karaik hodi halai sai. Fatin Komadante Nino Konisantana, subar fatin ne'e, ami halomais ou menus iha fulan rua ka ba fulan tolu nia laran. Bainhira hotu tiha Komadante Nino Konisantana mos mai hela ona iha fatin ida ne'e. Komadante Nino Konisantana ho nia siguransa ida ida ho naran Sumoco mak hela. Servisu Komadante Nino Konisantana nian loron-loron tuir hau hatene, duranti iha subarfatin mak planu stratejia girilia, halo surat ba rede klandistina sira no komadante girilirus sira. Nomos resposta surat ruma husi rede klandistina sira ka husi liur ne'ebé husu buat ruma kona-ba prosesu funu ne'e. Surat sira ne'ebé husi redi klandistina sira kadabes hau mos simu hodi fo ba Komadante Nino Konisantana. Nomos surat ruma husi Komadante rasik dalaruma foba hau mak hau lori fo ba ema sira ne'ebé iha redi klandistina nia laran. Iha aktividadi lori informasaun hanesan ne'e sira komesa hanorin hau oinsa bele lori kartaun ne,e to'o fatin no labele ema hetan. No sira mos fo hatene ona kona-ba konsikoinsa saida mak hau hetan bainhira surat ne'ebé hau lori ema ruma hetan, liu-liu militar indonesia sira. Primeiru hau tenki mate no hau nia familia tomak sei mate hotu. Amisa hanesan ne'e hau hetan rasik husi siguransa Komadante Nino Konisantana rasik katak "se o fo hatene ema ruma kona-ba ami iha ne'e no ema ruma hatene o lori surat husi ne'e, ami sei oho o no sei oho hotu onia familia sira tomak". Hau simu lia fuan ne'e laos hanesan ameasa ida mai hau maibe lia-fuan ne'e sai hanesan lia-fuan ida fo korajen mai hau hodi halo buat hotu-hotu ho sintidu no brani. Prosesu tomak ne'ebé Komadante Nino Konisanta, hala'o hau sempre akompaña. Maibé iha mos buat sigiredu balun ne'ebé sira forsa deit mak hatene. Prosesu hanesan ne'e la'o nafatin to'o hau akaba hau nia estudu iha Eskola Primaria Ermera. Bainhira hau remata tiha eskola primaria, ho laran susar hau tenki husik hela hau nia familia sira iha Ermera ba Gleno hodi kuntinua hau nia eskola ba Eskola Presekundari Gleno. Tanba dook husi uma, hau tenki hela iha hau nia bin sira nia uma ne'ebé iha Gleno. Tinan primeiru hau tama iha eskola presekundaria, hau ladun iha konsentrasaun ba eskola. Dala-barak liu hau hala'o aktividadi klandistina. Lori informasaun kona-ba situasaun ne'ebé hau hetan no lori surat ruma husi redi klandistina sira ba Komando. Nune'e mos lori surat husi komado ba kaisa sira. Tanba aktividadi sira hanesan ne'e nia konsikuensi ba hau nia eskola mak hau lafasa klase. Tanba hau nia valor rapot nebe ki'ik liu. Hau hanoin hau la pasa klase tanba hau halo aktividadi hanesan hau nia apa halo. Hau imajina katak hau nia apa sei la hirus hau. Maibé hau nia hanoin ne'e sala. Bainhira hau nia apa rona hau lapasa klase, hau nia apa hirus teb-tebes. Hau nia apa hodi ai ma baku hau to'o hau nia isin sira kanek hotu. Foti hau nia farda eskola nia lees tiha no baku hau nafatin hodi koalia ba hau, "duranti ne'e hau fo an ba mati hodi halo funu, la'os hanoin ba hau nia an. Hau halo tanba hanoin duni ba imi sira hau nia oan sira ne'e. Ba imi nia diak iha futuru". Continua ba Ed.2