Hanoin fila fali ita nia RESPONSABILIDADE Ba JUSTISA KRIME GRAVE

Komunikadu Da Imprensa Loron tolu tan, povu Timorense sei restaura aniversariu ba independensia nian. Mesmu tinan 10 ona entidades tomak komemora hodi festeza loron restaurasaun ho haksolok, maibe povu lubun balu komemora ho triste tamba kanek hirak nebe sira senti seidauk kurtivu no dadauk ne sei moras hela. Kanek hirak ne’e nunka diak sei bainhira ema nebe uluk halo hodi hamosu kanek sira ne sei nafatin livre husi julgamentu tribunal. Karik ita hotu bele imajina, sei iha kondisaun nebe ema balu haksolok no balu seluk triste ita bele dehan ne vitoria ba ita hotu? Karik ema balu hamnasa ho kontenti no seluk balu tanis ho matan ben, ita bele dehan nafatin ne harmonia no dame? Oinsa ita bele asegura hodi hapara impunidade sei bainhira ema sira nebe autor krime grave iha Timor-Leste `99` sei nafatin livre no laiha prosesu ruma ba sira? Tamba sa ita soe enerjia makas hodi hadia mekanismu servisu tribunal nian sei bainhira tribunal rasik laiha ona nehan hodi tata ema sira nebe komete krime grave kontra umanidade. Ami husu ba ita tomak atu tau konsiderasaun katak, ezizensia ba justisa krime grave laos deit nesesidade ba ema timor oan nomos laos muvimentu ka grupu ida nian maibe sai hanesan responsabilidade entidades tomak iha rai laran, komunidade internasional, liliu responsabilidade masimu ONU. Ami konsiente katak; ezizensia justisa laos deit ba ema timor oan maibe liutan ida ne’e atu prevene krime kontra umanidade no violasaun direitus umanus iha rai seluk iha tempo oin. Tamba ne ho firme ami hato’o katak, tempo to’o ona hodi hakotu korenti impunidade iha Timor no ba povu iha nasaun seluk. Tamba ne’e bazeia ba rezutadu “Planu Stratejiku ANTI nian duranti loron tolu husi 29 – 31 Marsu 2010 iha Dare-ISMAIK nebe parstisipa husi liu ema nain 50; husi grupo estudante, reprezentante vitima no familia vitima, ONG nasional no internasional no ativista solidariadade internasional. Ho nune’e ANTI konkretiza hanoin hodi husu; 1. Ba ONU, atu labele kontinua fo konfiansa ba Indonesia no Timor-Leste hodi prosesa kazu krime grave no krime kontra humanidade nebe akontese husi 1975-1999 maibe deside alternativu seluk hodi hamosu painel special hodi halao julgamentu foun ba autor kriminozu sira 2. Ba Emabaisada no konsuladu tomak iha Timor-Leste atu hato’o reportajen ba estadu idak-idak katak kestaun justisa ba krime grave no krime kontra umanidade husi 1975 – 1999 sai nafatin preukupasaun boot ba povu Timor-Leste. Ho nune’e laran metin ami husu ita boot sira nia asaun hodi inklui kestaun justisa krime grave sai nudar dever moral no formal iha ita bot sira nia estadu no sosiadade. 3. Ba organizasaun internasional no instituisaun internasional nebe apoiu dezenvolvimentu iha Timor-Leste atu mos tau preukupasaun ba assuntu justisa krime grave nudar xafi esensial ba aspeitu dezenvolvimentu hodi hametin estadu de direitu no demokrasia 4. Ba Parlamentu Nasional, atu ho seriadade hodi fo importansia no fo prioridade hodi diskute mekanisme estabelesementu instituisaun ba implementa relatoriu chega, nune’e labele hamosu polemika no kontaradisoens entre ulun nain sira bazeia ba opiniaun pesoal nebe bele prejudika lian vitima nebe mak ho honestu buka justisa no lia los ba krime grave no krime kontra umanidade. Ami fiar katak, povo Timor-Leste no ita tomak sei iha esperansa ba dame no amizade bele alkansa bainhira justisa ba krime grave no krime kontra umanidade iha Timor-Leste husi 1975 – 1999 bele iha prosesu justu no iha akontabilidade. Justisa ba povu Timor-Leste, Justisa ba emar tomak iha mundu rai klaran. Dili, 17 Maiu 2010 Ami saran lian,