Parlamentu Ba Povu...??? KA........... PARLAMEN PAJERO...!!!

Expresaun Estudante sira, wainhira PN la tuir ezijensia nebe Estudante sira hato'o iha PN nia oin.....karik estudante la konsidera ona hanesan elemento povo nia nebe hato'o sira nia opinaun ba PN.... PN ho arogante hodi sosa nafatin Careta Pazero ba sira an rasik.....(iha okos Studante sira nia Deklarasaun ba PN) Nudar ita hotu hatene katak Parlamentu Nasional nia papel mak produs, debate lei no halo fiskalizasaun. Nudar instituisaun hodi kontrola Governu no sai mos hanesan lian povu nian. Buat hirak ne lao tuir konseitu separasaun poder no hanesan kultura natureza iha fenomena klima demokrasia nia laran. Se ita hotu akompanha no monitoria lalaok iha Parlamentu Nasional duranti tinan 2008 too mai iha inisiu fulan Janeiru 2009, ita hatene momos saida mak sai prioridade ba membru Parlamentu sira. Komesa husi pensaun vitalisia, imunidade, ajensaun taxa, no dadaun KARETA PAJERO sai asuntu nebe debates namanas hela, no ikus mai mosu fali debates ba aumenta deputadu sira nia SALARIU. Nudar sidadaun ba rai ida ne’e, ita iha obrigasaun moral atu kontrola instituisaun estadu hodi hametin demokrasia. Ita nia direitu laos deit partisipa iha eleisaun maibe importante liu mak atu tau matan nafatin ba ema sira nebe ita hili ba. Se karik, nasaun persiza ita iha tempo eleisaun no la persiza tan ona bainhira eleisaun liu tiha, hanoin katak ema barak lakohi atu tuir festa eleisaun. Importante liu mak ita dehan nafatin ba sira atu ukun tuir ita hotu nia hakarak hanesan buat nebe konsagra iha Konstituisaun RDTL no laos tuir deit ukun nain sira nia hakarak. Ho ida nemak hafoin ita hanaran “demokrasia”. Maibe hanesan ita hotu akompahna katak, afinal Parlamentu ne’e hanesan “Majelis Buka Lukru” tamba nakonu ho intrese hodi hetan imunidade, ajensaun taxa, pensaun vitalisia, kareta pajero, no deputadu sira barak mak hahu hodi hein atu aumenta tan sira nia salariu nebe mak minimu dollar rihun 3 ba leten kada fulan (inklui perdiem vizita ba rai liur no rai laran, pulsa telefhone, osan transporte loro-loron nian, no osan asinatura). Karik ita bele imajina, sa kondisaun mak sei akontese, se bainhira povu nia rendimentu semana ida mak hafoin balu hetan centavos 50, maibe deputadus sira nia salariu a’as too lalehan. Karik ida nemak ita hanaran reprezentante povu.........? povu ida nebe mak sira reprezenta ba.........? Tamba ne, nudar jerasaun indijinius (rai nain) ba nasaun ida ne’e no hana’i ba rai ida ne’e, ami konsiente tebes katak; ho lalaok nebe mosu iha Parlamentu Nasional dadaun ne’e, sei la eduka povu, sei la liberta povu husi kiak no mukit. Hahalok ho modelu intrese pesoal atu ha’riku sira nia a’an ne’e faz parte esplora povu no invade fali nia povu rasik nebe sei kiak, sei beik atu beik no kiak ba nafatin. “Konseitu libertasaun povu, ne sai hanesan retorika baratu, hodi aproveita supa riku soin rai ne nian, hodi habokur induvidual no familia liu husi manobra no slogan politika mafiozu.” Tau matan ba, identifika ba, se-se mak sai duni iha intrese ba povu nia sofrementu durante ne’e...??? hamutuk ho ita hotu iha responsabilidade atu hateten ba se deit nebe mak ukun atu tuir hodi tau uluk povu nia nesesidade ho honestu! A Luta.........!!! Dili, 12 Janeiru 2009 Sekretariat Dapur Front Mahasiswa Timor Leste (Hakarak fo ideia, sujestaun no kritika ruma, bele kontaktu : 734 5564 / 728 9241)