UNE-TL Finaliza Wood Badge no TOT ba nia Lideransa Nasional

Press Release.

Konselho Nasional União Nasional dos Escuteiros de Timor-Leste nudar organisasaun sumbriña ba Escuteirus iha Timor- Leste. União Nacional dos Escuteiros de Timor-Leste moris iha loron 2 Desembro 2005 nebe mai husi organizasaun Scout Timor Leste (Eis Pramuka) no Corpo Eskuteiros Catoliko. UNE-TL hari ho objektivo katak organizasaun Eskuteiros uniko iha Timor Leste. Timor Leste hanesan mos nasaun sira seluk iha mundu hola mos parte iha escutismo mundial nian nebe sai hanesan mata dalan ba dezenvolvimento nasional liu husi nia knar hanesan forma juventude sira liu husi metodo no prinsipio universal escutismo nian. UNE-TL Representa Timor Leste iha Movemento Eskutismo mundial (WSOM = World Scout Organization Movement) ho prinsipo Eskutismo nebe mai husi Fundador Lord Baden Powell hahu 1907. Ho prosesu registo husi APR Bureau (Asia Pacific Regional Bureau). Organiza Evento Nasionais no partisipa iha eventu Regional no Internasional. Iha loron 27-31 Outobru 2011 iha salao Centro Formasaun Non Formal (eis SKB) Vila Verde UNE-TL konsege halao treinamento avansadu ba lideransa escuteiros hamutuk nain 32 nebe mai husi Distritu hat (4) maka hanesan Distritu Dili nain rua nolu (20), Distritu Aileu nain hitu (7), Distritu Baucau nain tolu (3) no Distritu Lautem nain rua (2) ho komposisaun Feto nain nen (6) i mane nain rua nolu resin nen (26). Treinador ba avansado lideransa hirak ne’e mai husi Australian Scouting nebe hetan konviansa husi Asia Pasifiku Regional. Treinamentu ne’e parte husi rekerementu ida atu supporta UNE-TL ba preparasaun hodi sai membru Asia Pasifiku nian no World Scout Organization Movement (Movementu Escuteirus Mundial). Ne’e hanesan kriteria atu sai membru ba APR no WSOM, katak UNE-TL tengki iha Lideransa nebe mak prense kriteria balun no iha woodbadge no mos atu sai sai nudar treiandor ba lideransa escuteirus iha futuru. Depois de treinamentu iha Fulan Outobru tinan kotuk sei fo tempu ba lideransa sira atu implementa materia nebe mak treinador sira fo atu sira implementa iha agrupamentu durante fulan tolu (3) nia laran no mos iha monitorizasaun no evaluasaun husi Komisariu Adultu UNE-TL nian Komisario Angelino Melo da Costa no ikus sai hanesan sasukat ida ba lidaransa sira atu tara lensu gilwell nian no woodbadge (Sai ona nudar Komunidade Woodbagde) iha WSOM. Katak lideransa sira ne bele tama ona ba kriteria ida atu sai nudar treinador ba lideransa sira seluk iha teritorio Timor laran tomak. Rezultadu husi ida ne iha loron 28 Maio 2012 iha Centru Juvenil Padre Antonio Viera Tai-besi lideransa sira halibur an atu halo evaluasaun final ba aktividade nebe sira halao tiha ona no iha evaluasaun ne’e mak determina atu hetan woodbadge ne, iha tempu ne lidaransa rua nolu resin nen (26) husi tolu nolu resin rua (32) mak partisipa simu Woodbage no lensu gillwell husi treinador Internasional Asia Pasifiku. Depois simu tiha Woodbage no lensu gillwell lideransa nain sanolu (10) kontinua halao fali treinamento sai treinador (TOT= Training of Trainner) durante loron hat (4) nia laran 29 Maio to loron 1 Junhu 2012. Mak ne’e deit ami nia karta ba impresa, ba ita bot sira nia kolaborasaun la haluha ami hato’o obrigado wa’in. “ALERTA” Dili, 31 de Maio 2012

DISKURSU KOMPLETU PREZIDENTE TAUR MATAN RUAK:

Povu Timor‐Leste , belun no bainaka sira husi rai‐laran no rai‐li’ur. Hodi Estadu Timor‐Leste nian naran, ha’u hato'o benvindu ba Ita‐Boot sira hotu no ho laran tomak, ha’u agradese ba ita‐nia bainaka sira ne’ebé mai husi dook hodi fó onra boot ba ita ho sira‐nia prezensa. Obrigadu barak tanba hola parte hamutuk ho ami iha momentu ho signifikadu boot ida‐ne’e. Ha’u foin simu pose nu’udar Prezidente ba dalimak Repúblika Demokrátika Timor‐Leste nian. Iha fatin ida‐ne’e duni, iha 1989, Sua Santidade Amu‐papa João Paulo II selebra misa. Tinan sanulu liubá, mós iha fatin ida‐ne’e duni, ita selebra ho ita‐nia Povu, iha mundu nia oin, restaurasaun ba ita‐nia independénsia ho simu pose ba Presidente badala tolu, Kay Rala Xanana Gusmão. Iha loron ohin ha’u simu responsabilidade hodi xefia Estadu ida ne’ebé hakmatek, estavel, no iha dame nia laran. Prezidente José Ramos‐Horta, dedika nia vida no tempo iha tinan haatnulu nia laran hodi serbí ita‐nia Povu no ita‐nia nasaun. Ninia servisu no dedikasaun nu’udar ezemplu di’ak tebes no ita hotu tenke hetan inspirasaun hodi banati tuir. Agradese mós tanba iha koordenasaun di’ak ba tranzisaun hodi asegura katak buat hotu la’o diak ho maneira kompetente no tuir regras nebe iha. Kbiit ne’ebé fó motivasaun mai ha’u atu kaer responsabilidade xefia Estadu Timor‐Leste nian mai husi Povu Timor, maibé mai mós husi ha’u‐nia família, ha’u‐nia kaben , ha’u‐nia oan sira, ha’u‐nia maun‐alin, maluk no belun sira. Ha’u assume responsabilidade ne’ebé ohin entrega formalmente mai ha’u, nu’udar rezultadu husi eleisaun ne’ebé livre no justu. Maibé ha’u mós simo responsabilidade ida‐ne’e nu’udar rezultadu husi buat hotu ne’ebé ha’u rona husi ita‐nia Povu, husi análize ne’ebé ha’u halo ba situasaun iha ita‐nia nasaun no ita‐nia Istória, no mós ba buat ne'ebé hau fiar ita bele alkansa iha futuru. Bainhira ita hateke ba ita‐nia Istória ita hare momentu sira ne’ebé ho serbisu maka’as, ho dedikasaun no onra foti ita‐nia nasaun, hodi sees an husi situasaun runguranga no destruisaun. Ita nia Istória, Istória luta nian, serbisu maka’as nian. Tanba ne’e maka ita konsege to’o iha ne’e, to’o iha loron ne’ebé ita hahú selebrasaun aniversáriu restaurasaun independénsia ba dala sanulu. Ita‐nia pasadu nakonu ho serbisu no dedikasaun ba nasaun ne’ebé tenke halo ita foti ulun ho orgullu ‐ tenke kontinua moris hi’as, tenke transfere fali ba loron ohin, atu hasai ita‐nia Povu no ita‐nia nasaun husi situasaun ne’ebé maioria sei kiak nafatin ba fali situasaun ne’ebé maioria hetan moris diak. Só ho serbisu no dedikasaun ba ita‐nia nasaun nia futuru maka ita bele alkansa dezenvolvimentu sosiál, ekonómiku, fíziku, polítiku, sientífiku no kulturál ne’ebé ita‐nia povu hakarak, merese, no iha direitu atu hetan. Iha loron ne’e, bainhira ita avalia ita‐nia nasaun nia situasaun, ita haree momoos katak ita alkansa tiha ona buat barak – no ita tenke sente orgullu ba ida‐ne’e, nu’udar Povu no nu’udar Nasaun ‐, maibé ita mós tenke, ho onestidade, rekoñese, enfrenta no korrije defisiénsia no sala sira nebe sei iha. Iha momentu ne’ebé ita selebra loron 20 Maiu , nasaun tomak tenke halibur an haleu objectivo nebe concreto. Objetivu sira‐ne’ebé ita‐nia Povu sente importante no merese duni esforsu no serbisu makas husi timoroan hotu, tanba, bainhira alkansa tiha, ne’e signifika sei hetan moris diak, prosperidade, seguransa, estabilidade no koezaun nasionál. Durante kampaña eleitorál ha'u aprezenta hau nia Vizaun, ne’ebé esplika ho detalle liña‐orientasaun no prioridades atu transforma ita‐nia nasaun. I lori Vizaun ida ne duni maka Povu hili ha’u. Nune’e, preokupasaun boot liu mai ha’u maka: Seguransa no moris diak. Buat rua ne’e labele haketak malu. Soberania no independénsia nasionál nia baze maka sistema ekonómiku nebe koerente no sustentavel, ne mak fo dalan ba moris diak. Ha’u hanoin katak importante tebes atu muda esénsia husi sistema ekonómiku ne'ebé agora daudaun iha ita‐nia nasaun. Diversifikasaun ba ita‐nia ekonomia, hamutuk ho sistema produsaun ne’ebé hamosu duni empregu no hamenus ependénsia esterna, ezije ita hametin setór privadu nasionál no aproveita, ho maneira rasionál no sustentavel, kusoin ne’ebé ita nia Rain iha. Parte signifikativa husi dezafiu ida‐ne’e sei ezije ‐ formasaun no kualifikasaun ba ita‐nia rekursus umanus, ne’ebé mós tenke kaer metin valór patriótiku no étiku; dexentralizasaun atividade ekonómika liu hosi hamosu polu dezenvolvimentu oioin ho infraestrutura adekuada no ho rekursus umanus ne’ebé di’ak; ‐ kapasidade odi dada investimentu husi rai‐li’ur, no di’ak liu se mai serbisu hamutuk emprezáriu timor oan sira hodi kria empregu ba ita‐nia sidadaun sira, ne’ebé la limita de’it ba sidade no vila boot sira. ‐ hamenus dependénsia husi rai‐li’ur no husi petróleu. Sira‐ne’e hotu nu’udar kondisaun mínima no viavel hodi aproveita kompletamente ita‐nia potensiál tomak, atubele asegura katak ita iha duni kbit atu atende nesesidade ita‐nia Povu nian. Nune’e urjente tebes atu fó atensaun liu‐liu ba zona sira nebe Estado nia presensa fraco no progresu sosiál, fíziku no ekonómiku seidauk to’o iha ne’ebá. Iha tempu hanesan, moris iha demokrácia, respeitu tomak ba sidadaun sira‐nia direitu no devér, reforsa espíritu toleránsia no hametin ita‐nia Estadu‐de‐Direitu dalan mesak atu hametin koezaun sosiál no unidade nasionál. Nu’udar garantia ba funsionamentu instituisaun Estado nian, ha’u afirma katak importante tebes atu envolve sidadaun sira iha prosesu transformasaun ba ita‐nia nasaun hodi arranka duni tuir dalan ba progresu. Inklui ita‐nia sidadaun sira, ne’e indispensavel atu hetan moris diak ne’ebé sustentavel no dura kleur duni. Seguransa no bein‐estár ba ita‐nia Povu, halo ita‐nia sidadaun sira hotu komprende tebes katak ita Povu ida de’it, hadi’ak ita sistema defeza no seguransa, komplementa ho asaun diplomátika no dezenvolvimentu relasaun viziñansa di’ak no kooperasaun ekuitativa iha rejiaun no iha mundu, buat sira ne’e hotu maka sei garante di’ak liután integridade Timor‐Leste nian. Impossivel atu hanoin kona‐ba seguransa nasionál se ita la tau konsiderasaun interasaun ho nasaun sira seluk iha rejiaun no iha mundu. Iha tempo ne’ebé ita moris dadaun, imposivel ita ses an husi akontesimentu sira ne’ebé akontese iha fatin seluseluk iha ita‐nia planeta, ne’ebé, ho maneira oioin, afeta mos ita hotu nia vida. Timor‐Leste simu no hetan benefísiu husi apoiu ne’ebé komunidade internasionál fó ho laran‐luak atu ita‐nia nasaun afirma ninia direitu atu sai livre no soberanu. Iha organizasaun no indivíduu barak ne’ebé fó sira‐nia apoiu tomak ba ita. Tuir mai, asisténsia ba Timor‐Leste komesa iha karater formál liután hanessan Estadu, no ida‐ne’e fó biban ba ninia rekonstrusaun fízika no mos konfigurasaun Estadu nian. Ha’u hakarak aproveita okaziaun ida‐ne’e atu hato’o ami‐nia rekoñesimentu no obrigadu ba Ita‐Boot sira hotu. Timor‐Leste ho ninia Povu hakarak nasaun ne’e nu’udar Nasaun Pás nian, nakloke ba mundu no iha diálogu ho mundu. Ami membru husi ONU, husi CPLP, husi Movimentu País Naun‐Aliñadu sira, ami membru husi organizasaun oioin Pasífiku nian, no ami la’o metin tuir dalan atu tama iha ASEAN. Kondisaun nu’udar membru ba organizasaun internasionál barak no serbisu ne’ebé ita mós hala’o iha organizasaun seluseluk , estatál no naun‐governamentál, nu’udar dalan hodi fila kooperasaun ne sai instrumentu util atu alkansa objetivu nasionál importante. Tuir ita nia obrigasaun internasionál, ha’u reafirma Timor‐Leste nia determinasaun hodi kumpre konvensaun, paktu no akordu sira ne’ebé subskreve tiha ona ka sei atu subskreve iha futuru, sempre ke sira kontribui ba Pás, respeitu ba direitus umanus no moris diak i seguransa ba ita‐nia Povu. Dezafiu sira hotu iha ita‐nia oin ezije SERBISU makas no la para. Buat ne’ebé natureza fó ba ita tenke rega ho ita nia kosar‐been no esforsu! Uluk ita‐nia nasaun ezije ita‐nia raan no ita‐nia luta, agora, ita‐nia nasaun ezije ita‐nia kosar‐been no ita‐nia serbisu maka’as! Hametin no reforsa ita‐nia Identidade Nasionál, halo ema sente orgullu nu’udar timoroan, kaer metin nafatin valór sira ne’ebé ita simu husi ita‐nia bei’ala sira, ne’ebé konfigura ita‐nia Istória… fatór sira ne’e importante tebes iha mundu ne’ebé muda hela de’it, ne'ebé ita nia soberania lakon kbiit no fronteira sira hetok mihis li

u tan. Ida‐ne’e ITA‐NIA nasaun, maski ita simu apoiu no kooperasaun husi nasaun belun no parseiru dezenvolvimentu sira , responsabilidade atu transforma nasaun ne’e ITA‐NIAN! Transformasaun ne’e posivel duni. Ita ko’alia kona‐ba ida‐ne’e bainhira ita temi dezenvolvimentu sosiál, ekonómiku, fíziku, polítiku, tékniku‐sientífiku no kulturál. Maibé, ko’alia de’it kona‐ba saida maka presiza halo, ne’e la sufisiente. Fundamentál tebes timoroan sira hotu sente futuru ne’e sira‐nian rasik. Fundamentál tebes timoroan sira hotu haka’as an atu transforma Timor‐Leste. Fundamentál tebes ba timoroan sira hotu konsidera katak serbisu maka'as no étiku hanesan kontribuisaun individuál ba nasaun ne’ebé ita hotu‐hotu nian, no tenke asegura katak moris diak no estabilidade too ita hotu. Ohin ha’u hahú simu knaar nu’udar Prezidente Repúblika , hateten ba Povu tomak katak ha’u sei sai ezemplu ba buat hotu ne’ebé ha’u husu daudaun ba imi: serbisu maka’as, kaer metin espirito étika profisionál no sidadania nian, fó respeitu tomak ba Konstituisaun no instituisaun sira ne’ebé garanti hodi hametin demokrasia no Estadu‐de‐Direitu no kumpre objetivu supremu hodi serbí ita‐nia Povu. Ida‐ne’e maka dalan nebe ha’u husu imi atu la’o ho ha’u. Atu iha tinan lima nia laran mai, ita bele haree ba kotuk no dehan: ita‐nia esforsu vala duni! Ita‐nia nasaun oin‐seluk ona. Ema hotu sente iha estabelidade .Moris diak komesa sai realidade ba sira ne’ebé merese liu, ne’ebé haka’as an, ne’ebé serbisu no husu de’it atu bele hala’o sira‐nia moris ho dignidade no Pás. Doben Timor oan sira, Povo Timor‐ Leste, laiha ona tempo atu lakon tempo ba konflito no lian naksalak nebe folin laek. Laiha ona fatin atu hanoin deit servisu ba fama , prazer, poder no riku soin. Tempo atu servisu makas, tempo atu hateke ba oin, tempo atu lao hamutuk hodi hases’an husi mukit no terus nebe sobu ita hotu nia moris no futuru. Mai ita hamutuk fo liman ba malu, hodi nakfilak ita rain sai Nasaun ida nebe Riku, Forte no Hakmatek. Maromak tulun ita hotu. Tasi Tolu, 20 Maiu 2012